Joriy yilning 21–23- fevral kunlari Oʻzbekiston Respublikasi Sport vazirligi tashabbusi bilan Toshkent viloyati, Boʻstonliq tumanidagi Chimyon qishlogʻida an’anaviy “Chimgan challenge – 2025” qishki sport festivali oʻtkazildi.
Ushbu festivalda 120 ta vazirlik, idora va tashkilotlarning sport targʻibotchilari o‘rtasida sportning mini-futbol, voleybol, stritbol va stol tennisi sport turlari bo‘yicha o‘zaro musobaqalar bo‘lib o‘tdi.
“Chimgan challenge – 2025” qishki sport festivali O‘zbekiston Respublikasi Prezidentining “Qishki sport turlarini rivojlantirish chora-tadbirlari to‘g‘risida”gi qarori, Vazirlar Mahkamasining “Aholining sog‘lom turmush tarzini qo‘llab-quvvatlash va jismoniy faolligini oshirishga doir qo‘shimcha chora-tadbirlar to‘g‘risida”gi qarori ijrosini ta’minlash hamda davlat organlari va tashkilotlarining sport targ‘ibotchilari orasida jismoniy tarbiya va sport bilan muntazam shug‘ullanishni keng targ‘ib qilish maqsadida tashkil etildi.
Festivalning dastlabki kunida tadbir ishtirokchilari uchun O‘zbekiston Respublikasi Sport vaziri maslahatchisi Sharifjon Mo‘mindjanov Davlatimiz rahbari tomonidan aholi o‘rtasida sportni ommalashtirish bo‘yicha ilgari surilgan tashabbuslarning mazmun-mohiyati haqida so‘z yuritdi.
Mazkur festivalda Statistika agentligining sport targ‘ibotchisi Djalilov Bobur ishtirokidagi jamoa “Mini futbol” sport musobaqasida faxrli 3-o‘rinni qo‘lga kiritdi.
Musobaqalar yakunida g‘olib va sovrindorlarga tashkilotchilar tomonidan diplom va esdalik sovg‘alari topshirildi.
