Joriy yilning 25–26-iyul kunlari Davlat statistika qo`mitasining 2019-yilning I yarim yilligi yakunlariga bag`ishlangan kengaytirilgan Hay`at yig`ilishi bo`lib o`tdi. Yig`ilishda milliy statistika tizimini takomillashtirish yuzasidan O‘zbekiston Respublikasi Prezidenti va Hukumatining hujjatlari hamda topshiriqlarida belgilab berilgan vazifalarning ijrosi yuzasidan davlat statistika organlarida 2019-yilning I yarim yilligida amalga oshirilgan ishlar hamda kelgusidagi ustuvor vazifalar muhokama qilindi.
Kun tartibiga binoan O‘zbekiston Respublikasi Prezidentining 2019-yil 9-apreldagi “Davlat boshqaruvining ochiqligi va shaffofligini ta’minlash hamda mamlakatning statistika salohiyatini oshirish yuzasidan qo‘shimcha chora-tadbirlar to‘g‘risida”gi PQ-4273-son Qarorida Davlat statistika organlariga yuklatilgan vazifalar ijrosi yuzasidan amalga oshirilayotgan tadbirlar natijadorligi ko‘rib chiqildi.
Shuningdek, O‘zbekiston Respublikasi Prezidentining 2019-yil 27-maydagi “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbirlari to‘g‘risida”gi PF-5729-son Farmoni bilan belgilab berilgan vazifalar ijrosi hamda xorijiy mamlakatlar statistika organlari bilan o`zaro hamkorlikni tashkil etish, xalqaro statistik, moliyaviy va iqtisodiy tashkilotlarga statistik axborotlarni taqdim etish bo`yicha 2019-yilning I yarim yilligida amalga oshirilgan ishlar samaradorligi bo`yicha masalalar yig`ilish kun tartibidan o`rin oldi.
Kengaytirilgan Hay`at yig`ilishi yakunida ijro intizomi va tashkiliy masalalar ko`rib chiqilib, natijalar bo`yicha tegishli qarorlar qabul qilindi.
2019-yilning II yarim yilligi uchun Hay`at ish rejasiga kiritilgan vazifalarning o`z vaqtida va sifatli bajarilishi masalalari muhokama qilindi.
Axborot xizmati