Жорий йилнинг 21–23- феврал кунлари Ўзбекистон Республикаси Спорт вазирлиги ташаббуси билан Тошкент вилояти, Бўстонлиқ туманидаги Чимён қишлогъида анъанавий “Чимган чалленге – 2025” қишки спорт фестивали ўтказилди.
Ушбу фестивалда 120 та вазирлик, идора ва ташкилотларнинг спорт таргъиботчилари ўртасида спортнинг мини-футбол, волейбол, стритбол ва стол тенниси спорт турлари бўйича ўзаро мусобақалар бўлиб ўтди.
“Чимган чалленге – 2025” қишки спорт фестивали Ўзбекистон Республикаси Президентининг “Қишки спорт турларини ривожлантириш чора-тадбирлари тўғрисида”ги қарори, Вазирлар Маҳкамасининг “Аҳолининг соғлом турмуш тарзини қўллаб-қувватлаш ва жисмоний фаоллигини оширишга доир қўшимча чора-тадбирлар тўғрисида”ги қарори ижросини таъминлаш ҳамда давлат органлари ва ташкилотларининг спорт тарғиботчилари орасида жисмоний тарбия ва спорт билан мунтазам шуғулланишни кенг тарғиб қилиш мақсадида ташкил этилди.
Фестивалнинг дастлабки кунида тадбир иштирокчилари учун Ўзбекистон Республикаси Спорт вазири маслаҳатчиси Шарифжон Мўминджанов Давлатимиз раҳбари томонидан аҳоли ўртасида спортни оммалаштириш бўйича илгари сурилган ташаббусларнинг мазмун-моҳияти ҳақида сўз юритди.
Мазкур фестивалда Статистика агентлигининг спорт тарғиботчиси Джалилов Бобур иштирокидаги жамоа “Мини футбол” спорт мусобақасида фахрли 3-ўринни қўлга киритди.
Мусобақалар якунида ғолиб ва совриндорларга ташкилотчилар томонидан диплом ва эсдалик совғалари топширилди.
