Davlatimiz rahbari tomonidan 2021- yil 3- dekabrda “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida”gi hamda “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha davlat siyosatining ustuvor yoʻnalishlari toʻgʻrisida”gi farmonlari qabul qilingan edi.
Mazkur farmonlar ijrosini taʼminlash maqsadida yurtimizdagi har bir mahallaga hokim yordamchilari hamda ularning ish samaradorligini oshirish uchun respublika davlat idoralari va tashkilotlaridan maxsus vakillar biriktirilgan.
Davlat statistika qoʻmitasi tizimidan ham 19 nafar respublika vakillari tuman va shaharlardagi mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha hokim yordamchilari bilan birgalikda faoliyat yuritmoqda.
Biriktirilgan respublika vakillari va hokim yordamchilari har kuni mahallalarda aholi bilan muloqot qilib, ularning muammolarini tinglab, mavjud kamchiliklarni oʻz vaqtida bartaraf etishga harakat qilishmoqda.
Andijon viloyati Oltinko`l tumaniga Davlat statistika qoʻmitasidan respublika vakili etib biriktirilgan Bunyodbek Nishonboyev ham tumandagi mahallalarda faoliyat yuritayotgan hokim yordamchilari bilan birgalikda aholi turmush tarzini oshirish yoʻlida mehnat qilmoqda.
Maʼlumot uchun, Oltikoʻl tumanidagi 56 ta mahalla fuqarolar yigʻinida 185 ming nafar aholi istiqomat qiladi. Shundan “Temir daftari”da 119 nafar, “Ayollar daftari”da 3550 nafar, “Yoshlar daftari”da 293 nafar fuqaro roʻyxatda turadi.
Respublika vakillari va hokim yordamchilari tashabbusi bilan 2022- yilning 10 oyi davomida Oltinkoʻl tumanidagi 1356 nafar fuqaroga tadbirkorlik uchun 29 milliard 783 million soʻmlik imtiyozli kreditlar ajratildi.
Oʻtgan davr davomida respublika vakillari va hokim yordamchilari tashabbuslari bilan 181 ta yangi loyihalar ishga tushirilib, 423 nafar fuqarolar bandligi taʼminlandi.
Respublika vakillari va hokim yordamchilari tashabbusi bilan jami 158 nafar fuqaroga, 969 mln. soʻmlik subsidiya ajratildi.
Matbuot xizmati