MILLIY STATISTIKA QO‘MITASI

Joriy yilning 17-iyun kuni davlat xizmatlarini koʻrsatish bosqichlarini maqbullashtirish, jismoniy va yuridik shaxslarga ortiqcha majburiyatlar yuklatilishining oldini olish, davlat tashkilotlari, aholi va biznes oʻrtasida raqamli muloqotni toʻlaqonli yoʻlga qoʻyish va bu boradagi islohotlar samaradorligini oshirish maqsadida “Byurokratiyani bartaraf etish – 2030” dasturini amalga oshirish va innovatsiyalarni joriy etish boʻyicha loyiha ofisi masʼul xodimlari tomonidan Milliy statistika qoʻmitasida amaliy ishchi uchrashuv tashkil etildi.

Mazkur uchrashuv Oʻzbekiston Respublikasi Prezidentining 2025-yil 28-noyabrdagi “Davlat boshqaruvini raqamli transformatsiya qilish va samaradorligini oshirishga qaratilgan tashkiliy chora-tadbirlar toʻgʻrisida”gi F–68-son farmoyishiga muvofiq tashkil etildi.

Uchrashuv davomida qoʻmita faoliyatidagi mavjud ish jarayonlarini tahlil qilish, ortiqcha byurokratik bosqichlarni qisqartirish, maʼlumotlar almashinuvini soddalashtirish, shuningdek, fuqarolar va tadbirkorlik subyektlari uchun qulayliklarni oshirish masalalari muhokama qilindi.

Loyiha ofisi vakillari tomonidan “Zero Bureaucracy” raqamli platformasi orqali takliflarni shakllantirish, koʻrib chiqish va amalga oshirilgan ishlarning samaradorligini baholash tartibi yuzasidan tushuntirishlar berildi.

Uchrashuv yakunida qoʻmita faoliyatida davlat hizmatlarini koʻrsatishda ortiqcha tartib-taomillarni qisqartirish, maʼlumotlarni qayta soʻrash amaliyotini kamaytirish, raqamli yechimlardan foydalanishni kengaytirish hamda “Byurokratiyani bartaraf etish – 2030” dasturi doirasida amalga oshiriladigan takliflarni shakllantirish boʻyicha kelishib olindi.

Mazkur uchrashuv Milliy statistika qoʻmitasida ish jarayonlari samaradorligini oshirish, statistik maʼlumotlarni tayyorlashda tezkorlik va shaffoflikni taʼminlash, shuningdek, aholi, tadbirkorlik subyektlari va davlat organlari uchun qulay statistik xizmatlar koʻrsatishni yanada takomillashtirishga xizmat qiladi.