Joriy yilning 26-28-fevral kunlari Oʻzbekiston Respublikasi Sport vazirligi tashabbusi bilan Toshkent viloyati, Boʻstonliq tumanidagi Chimyon qishlogʻida anʻanaviy “Chimgan challenge – 2024” qishki sport festivali oʻtkazildi.
Ushbu festivalda 140 ta vazirlik, idora va tashkilotlardan 135 nafar sport targʻibotchilari o‘rtasida sportning mini-futbol, voleybol, stritbol va stol tennisi sport turlari bo‘yicha o‘zaro musobaqalar bo‘lib o‘tdi.
Festival O‘zbekiston Respublikasi Prezidentining “Qishki sport turlarini rivojlantirish chora-tadbirlari to‘g‘risida”gi qarori, Vazirlar Mahkamasining “Aholining sog‘lom turmush tarzini qo‘llab-quvvatlash va jismoniy faolligini oshirishga doir qo‘shimcha chora-tadbirlar to‘g‘risida”gi qarori ijrosini ta’minlash hamda davlat organlari va tashkilotlarining sport targ‘ibotchilari orasida jismoniy tarbiya va sport bilan muntazam shug‘ullanishni keng targ‘ib qilish maqsadida tashkil etildi.
Festival doirasida ishtirokchilar uchun maxsus o‘quv seminar-treninglar ham tashkil etildi.
Shuningdek, Sport vaziri o‘rinbosari Durdona Raximova “Chimgan challenge – 2024” qishki sport festivali ishtirokchilari bilan ochiq muloqot o‘tkazdi. Ochiq muloqot davomida bildirilgan takliflar asosida shu yilning mart oyi “Sport targ‘ibotchilarining tashabbuslarini qo‘llab-quvvatlash” oyligi etib belgilandi.
Mazkur festivalda Statistika agentligining sport targ‘ibotchisi Djalilov Bobur ishtirokidagi jamoa “Stritbol” sport musobaqasida faxrli 1-o‘rinni qo‘lga kiritdi.
Musobaqalar yakunida g‘olib va sovrindorlarga tashkilotchilar tomonidan diplom va esdalik sovg‘alari topshirildi.