Mamlakatimizda 2026 yil 15 yanvardan 28 fevralgacha o‘tkaziladigan aholi va qishloq xo‘jaligini ro‘yxatga olish tadbiriga tayyorgarlik ishlari keng ko‘lamda amalga oshirilmoqda.
Joylarda tadbirning ikkinchi bosqichida uyma-uy yurib ro‘yxatga olish ishlarini amalga oshiradigan jamoa — “Mahalla yettiligi” aʼzolari uchun o‘quv seminarlari tashkil etib kelinmoqda.
Jumladan, Surxondaryo viloyatining Jarqo‘rg‘on va Muzrabot tumanlarida Milliy statistika qo‘mitasidan biriktirilgan masʼul vakil ishtirokida shu kabi o‘quv seminarlari o‘tkazildi.
Unda “Mahalla yettiligi” aʼzolariga ro‘yxatga olish jarayonlarini samarali tashkil etish, fuqarolar bilan muloqotni to‘g‘ri yo‘lga qo‘yish, maʼlumotlarni elektron tizimga xatosiz kiritish, shakllarni to‘g‘ri to‘ldirish hamda shu kabi boshqa muhim mavzular bo‘yicha amaliy ko‘rsatmalar berildi.
Ushbu o‘quv seminarlari “Mahalla yettiligi” aʼzolarining masʼuliyatini yana-da oshirish, ularni ro‘yxatga olish jarayoniga puxta tayyorlash va tadbirni sifatli tashkil etishda muhim omil bo‘lib xizmat qilmoqda.