O‘zbekiston Respublikasi Prezidentining 2018- yil 3- fevraldagi PF-5326-son “O‘zbekiston Respublikasi turizm salohiyatini rivojlantirish uchun qulay shart-sharoitlar yaratish bo‘yicha qo‘shimcha tashkiliy chora-tadbirlar to‘g‘risida”gi Farmoni tasdiqlangan edi.
Ushbu Farmonning ijrosini ta'minlash maqsadida, hamda “O‘zbekiston bo‘ylab sayoxat qil!” ichki turizmni rivojlantirish Dasturi doirasida Davlat statistika qo‘mitasi Kasaba uyushmasi tomonidan joriy yilning 25- sentabr kuni qo‘mita markaziy apparati xodimlari uchun Samarqand shahriga sayohat tashkil etildi.
Sayyohlar dastlab Registon majmuasiga tashrif buyurdilar. Ushbu majmua o‘quv muassasalari sifatida xizmat qilgan Ulug‘bek madrasasi, Sherdor madrasasi va Tillaqori madrasasi kabi uchta hashamatli binolar ansamblini tashkil etadi. Samarqandning tarixiy markazi hisoblangan Registon maydoni o‘zining qadimiy me'morchiligi go‘zalligi va ulug‘vorligi bilan хodimlarni o‘ziga jalb etdi.
So‘ngra, Samarqand shahrining boshqa diqqatga sazovor joylari, ko‘p yillik tarixni o‘zida aks ettiruvchi me'moriy obidalari va qadimiy yodgorliklarini yaqindan ko‘rish imkoniyatiga ega bo‘ldilar. Qadimiy Samarqandning yanada go‘zal va maftunkor manzilgohlari, madrasa, maqbara, minora va zamonaviy majmualarini tomosha qilish orqali tarix nafasini his qilib, katta taassurotga ega bo‘ldilar.
Soha tizimida faoliyat yuritayotgan xodimlar ushbu maroqli sayohat uchun tashkilotchilarga samimiy minnatdorlik bildirdilar.
Matbuot xizmati