Osiyo va Tinch okeani mamlakatlari statistika instituti Boshqaruv kengashining XVII sessiyasi doirasida 2021- yilning 30- noyabr – 1- dekabr kunlari Osiyo-Tinch okeani mintaqasidagi Milliy statistika idoralari rahbarlari uchun "Institutlarning o'zgarishi - bu odamlarning o'zgarishi" mavzusida boshqaruv seminari bo‘lib o‘tdi.
Ikki kunlik seminar kun tartibida Osiyo-Tinch okeani mintaqasi Milliy statistika idoralari rahbarlari inson resurslarini boshqarishda innovatsiyalar, maʼlumotlar integratsiyasini qoʻllab-quvvatlashda inson resurslarini boshqarish masalalarini muhokama qildilar.
Tadbirning ikkinchi kunida O‘zbekiston Respublikasi Davlat statistika qo‘mitasi raisi Bahodir Abdusalomovich Begalovning hisobotlari tinglandi.
Qo‘mita raisi o‘z nutqida O‘zbekiston Respublikasida gender tengligini ta’minlash sohasidagi huquqiy baza, gender statistikasini takomillashtirish bo‘yicha Davlat dasturlari va BRM ko'rsatkichlariga batafsil to‘xtalib o‘tdi.
Shuningdek, O‘zbekiston Respublikasi Prezidentining qarori bilan tasdiqlangan 2020-2025- yillarda statistikani rivojlantirishning Milliy strategiyasining “Yo‘l xaritasi”, Davlat statistika organlarida gender tengligiga rioya qilish va amalga oshirish masalalari, kadrlar siyosatini takomillashtirish va statistika salohiyatini oshirish masalalariga to‘xtalib o‘tildi.
Seminarda Osiyo-Tinch okeani mintaqasi milliy statistika idoralarining 70 dan ortiq vakillari ishtirok etdi.
Matbuot xizmati