Davlatimiz rahbari tomonidan 2021- yil 3- dekabrda “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida”gi hamda “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha davlat siyosatining ustuvor yoʻnalishlari toʻgʻrisida”gi farmonlari qabul qilingan edi.
Mazkur farmonlar ijrosini taʼminlash maqsadida yurtimizdagi har bir mahallaga hokim yordamchilari hamda ularning ish samaradorligini oshirish uchun respublika davlat idoralari va tashkilotlaridan maxsus vakillar biriktirilgan.
Davlat statistika qoʻmitasi tizimidan ham 19 nafar respublika vakillari tuman va shaharlardagi mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha hokim yordamchilari bilan birgalikda faoliyat yuritmoqda.
Biriktirilgan respublika vakillari va hokim yordamchilari har kuni mahallalarda aholi bilan muloqot qilib, ularning muammolarini tinglab, mavjud kamchiliklarni oʻz vaqtida bartaraf etishga harakat qilishmoqda.
Аndijon viloyati, Jalaquduq tumaniga Davlat statistika qoʻmitasidan respublika vakili etib biriktirilgan Sotvoldiyev Raximjon Xasanovich tumandagi mahallalarda faoliyat yuritayotgan hokim yordamchilari bilan birgalikda aholi turmush tarzini oshirish yoʻlida mehnat qilmoqda.
Maʼlumot uchun, Jalaquduq tumanidagi 63 ta mahalla fuqarolar yigʻinida 192 ming nafar aholi istiqomat qiladi. Shundan “Temir daftari”da 96 nafar, “Ayollar daftari”da 3850 nafar, “Yoshlar daftari”da 113 nafar fuqaro roʻyxatda turadi.
Respublika vakillari va hokim yordamchilari tashabbusi bilan 2022- yilning 9 oyi davomida Jalaquduq tumanidagi 3280 nafar fuqaroga tadbirkorlik uchun 46 milliard 118 million soʻmlik imtiyozli kreditlar ajratildi.
Oʻtgan davr davomida respublika vakillari va hokim yordamchilari tashabbuslari bilan 193 ta yangi loyihalar ishga tushirilib, 1810 nafar fuqarolar bandligi taʼminlandi.
Matbuot xizmati