Joriy yilning 1- mart kuni Oʻzbekiston Respublikasi Prezidenti huzuridagi Statistika agentligida gender statistikasini yuritish masalasida tadbir tashkil etildi. Unda Statistika agentligi xodimlari, tegishli vazirlik va idoralar vakillari ishtirok etishdi.
Tadbirda dastlab, Statistika agentligi direktori o‘rinbosari Zohidjon Ziyayev soʻnggi yillarda mamlakatimizda gender tenglikni taʼminlash, xotin-qizlar va erkaklar uchun teng huquq hamda imkoniyatlarga erishish, xotin-qizlarni ijtimoiy-huquqiy jihatdan qoʻllab-quvvatlashga qaratilgan keng koʻlamli islohotlar hamda gender statistikasini yuritish yuzasidan ijobiy ishlar amalga oshirilayotganini alohida taʼkidlab oʻtdi.
Shuningdek, O‘zbekiston Respublikasi Prezidentining 2019-yil 7-martdagi PQ-4235-son “Xotin-qizlarning mehnat huquqlari kafolatlarini yanada kuchaytirish va tadbirkorlik faoliyatini qo‘llab-quvvatlashga oid chora-tadbirlar to‘g‘risida”gi qarori doirasida amalga oshrilayotgan ishlar haqida ma’lumotlar berildi.
Ishtirokchilar O‘zbekiston Respublikasi Oliy Majlisi Senatining 2021-yil 28-maydagi SQ-297-IV-son qarori bilan tasdiqlangan “2030-yilga qadar O’zbekiston Respublikasida gender tenglikka erishish strategiyasining maqsadli ko‘rsatkichlari”ni shakllantirish va taqdim etilishi holati bo‘yicha ham fikr-mulohaza almashishdi.
Shundan soʻng, gender statistikasi boʻyicha gender.stat.uz veb-sayti va unda joylashtirib borilayotgan maʼlumotlar borasida Oʻzbekiston Respublikasi Prezidenti huzuridagi Statistika agentligi boshqarma boshligʻi Zoyir Yo‘ldoshev taqdimot qildi.
Shuningdek, vazirlik va idoralar aʼzolari tomonidan gender statistikasiga oid ko’rsatkichlarni shakllantirish yuzasidan berilgan savollarga Oʻzbekiston Respublikasi Prezidenti huzuridagi Statistika agentligi mutaxassislari atroflicha javob berib oʻtishdi.
Tadbir yakunida gender statistikasi boʻyicha maʼlumotlarni yigʻish, shakllantirish va uni foydalanuvchilarga eʼlon qilish borasidagi ishlarni yanada takomillashtirish yuzasidan hamkorlikda ishlarni amalga oshirish bo’yicha kelishildi.
Matbuot xizmati