Joriy yilning 17-may kuni “Hyatt Regency Tashkent” mehmonxonasida Oʻzbekiston Respublikasi Prezidenti huzuridagi Statistika agentligi tomonidan tashkil etilgan “Har bir ayol va qiz muhim” Global dasturi doirasida mamlakatimiz gender statistikasi potensialini baholash yuzasidan o‘rganish boʻyicha xalqaro seminar boʻlib oʻtdi.
Tadbirda Oʻzbekiston Respublikasi Prezidenti huzuridagi Statistika agentligi direktori o‘rinbosari Ziyayev Zoxidjan Muratovich boshchiligida agentlik xodimlari, BMTning gender bo‘yicha ekspertlari A.Negruta va T.Sekvava, Kambagʻallikni qisqartirish va bandlik vazirligi, Iqtisodiyot va moliya vazirligi, Maktabgacha va maktab ta’limi vazirligi, Markaziy bank, Markaziy saylov komissiyasi, Inson huquqlari bo‘yicha milliy markaz, Iqtisodiyot va moliya vazirligi huzuridagi Kadastr agentligi vakillari hamda soha boʻyicha bir qator tashkilotlar ekspertlari ishtirok etdi.
Yig‘ilishdan koʻzlangan maqsad, Milliy statistika tizimida ushbu baholash xalqaro tashkilot tomonidan gender statistikasini rejalashtirish, ishlab chiqarish va tarqatish tizimini takomillashtirishning ustuvor yo‘nalishlarini muvofiqlashtirish mexanizmlarini muhokama qilish, gender nuqtai nazaridan baholash bo‘yicha tahlil qilish va tarqatishni takomillashtirish , xalqaro va milliy kontekstdagi ilgʻor tajriba ulashish orqali bilim almashinuviga koʻmaklashishdan iborat bo‘ldi.
Shu bilan birga, Oʻzbekiston Respublikasi Prezidentining 2019-yil 7-martdagi PQ-4235-son qarori bilan “Gender.stat.uz” veb-saytiga joylashtirilishi lozim boʻlgan minimal gender koʻrsatkichlar va boshqa maʼlumotlar roʻyxati hamda Oliy Majlis Senatining 2021-yil 28-maydagi SQ-297-IV-son qarori bilan 2030-yilga qadar Oʻzbekiston Respublikasida gender tenglikka erishish strategiyasining 61 ta maqsadli koʻrsatkichlari tasdiqlangani alohida ta’kidlandi.
Seminar yakunida ekspertlar mavzuga doir savollarga atroflicha javob berishdi.
