Joriy yilning 5–7-iyun kunlari Samarqand shahrida Oʻzbekiston Respublikasi Prezidenti huzuridagi Statistika agentligi Birlashgan Millatlar Tashkilotining Sanoatni rivojlantirish tashkiloti (UNIDO) va Barqaror rivojlanish maqsadlari (BRM) boʻlimi bilan hamkorlikda, “Sharqiy Yevropaning ayrim davlatlari va Markaziy Osiyo mamlakatlarida sanoat statistikasini takomillashtirish va sanoat rivojlanishini tahlil qilish uchun statistik koʻrsatkichlarni ishlab chiqish” loyihasi doirasida “Sanoat statistikasi” boʻyicha mintaqaviy seminar o‘tkazildi.
Unda Armaniston, Ozarbayjon, Belarus, Qozogʻiston, Qirgʻiz Respublikasi, Moldova, Rossiya, Tojikiston, Turkmaniston hamda Oʻzbekiston Respublikasining masʼul xodimlari va ekspertlari ishtirok etmoqda.
Seminarda Oʻzbekiston Respublikasi Prezidenti huzuridagi Statistika agentligi direktori Begalov Baxodir Abdusalomovich qatnashib, soʻnggi yillarda mamlakatimizda statistika sohasini rivojlantirish uchun muhim qonun va qarorlar qabul qilinganini takidlab oʻtdi. Bu oʻz navbatida statistik maʼlumotlarning ochiqligi va shaffofligini oshirish, statistik koʻrsatkichlarni xalqaro darajada solishtirish, taqqoslash imkoniyati oshgani, xalqaro tashkilotlar tavsiyalari asosida statistik koʻrsatkichlarni shakllantirish metodologiyasini yanada takomillashtirish borasida muhim ahamiyat kasb etayotgani alohida qayd etildi.
Shuningdek, sohaga zamonaviy AKTini joriy etilgani, statistik kuzatuvlar toʻliq planshetlar orqali amalga oshirilayotgani, idoralararo axborot almashinuvi, integratsiya jarayonlari borasida ham toʻxtalib oʻtildi.
Agentlik rahbari mazkur xalqaro seminarda sanoat statistikasini rivojlantirish borasida qilingan taqdimotlar, bildirilgan taklif va tavsiyalari muhim ahamiyatga ega ekanligini takidlab, seminar ishiga muvaffaqiyat tiladi.
Seminar yakunida ishtirokchi davlatlarning ilgʻor tajribalarini amaliyotga joriy etish, sanoatda koʻp faktorli mehnat unumdorligi indeksini shakllantirish yuzasidan rivojlangan mamlakatlar tajribasini oʻrganish boʻyicha loyiha doirasida amalga oshiriladigan ustuvor vazifalar beligilab olindi.
