Joriy yilning 4–5- may kunlari Davlat statistika qo‘mitasida “HR tizimini joriy etish” mavzusida o‘quv-trening kurslari tashkil etildi.
Mazkur treningni o‘tkazishdan maqsad – 2020- yilning 1- iyun kuni Prezidentimiz Shavkat Mirziyoyev rahbarligida milliy statistika sohasini takomillashtirish chora-tadbirlari bo‘yicha o‘tkazilgan yig‘ilishda davlatimiz rahbari tomonidan statistika tizimini rivojlantirish, sohada mutaxassis-kadrlar salohiyatini oshirish yuzasidan berilgan vazifalar ijrosini ta’minlashdir.
Ushbu o‘quv kurslarida Toshkent davlat iqtisodiyot universiteti o‘qituvchilari – Sanjar G‘oyipnazarov, Samandar Qurbonov, Dilnoza G‘aniyeva qo‘mita xodimlariga mavzu yuzasidan keng tushunchalar berdi.
Jumladan, trening tinglovchilari “Korxona va tashkilotlarda HR tizimini joriy etish”, “Rekruting va rekrutment tushunchalari”, “2020- yildan so‘ng mehnat bozorida talab etiladigan yumshoq va qattiq ko‘nikmalar”, “Marketing va rekrutment jarayonlarining o‘zaro qiyoslanishi”, “HR mutaxassislari bilishi lozim bo‘lgan xodimlarning imtiyozlari” kabi mavzularda o‘z malakasini oshirdi.
Shuningdek, tinglovchilar “Nomzodlarni ishga qabul qilishdan oldin o‘tkaziladigan suhbat turlari”, “Onboarding” texnologiyasining darajalari”, “KPI tizimining ijobiy va salbiy jihatlari”, “Kouching va mentoring” singari zamonaviy metodik usullar bo‘yicha batafsil ma'lumotlar olishdi.
Trening davomida o‘qituvchilar tinglovchilar bilan statistika ma’lumotlarining sifati va ishonchliligini oshirish, milliy statistika tizimini yanada takomillashtirish va rivojlantirish masalalarida fikr-mulohaza almashib, kelgusida amalga oshirilishi lozim bo‘lgan muhim vazifalar haqida suhbatlashdi.
Matbuot xizmati