Qo‘mitamiz faoliyatining ustuvor yo‘nalishlaridan biri — xodimlar, ayniqsa kasaba uyushmasi a’zolarining huquq va manfaatlarini himoya qilish, ular uchun qulay, xavfsiz va zamonaviy mehnat sharoitlarini yaratishdir. Bu borada izchil va tizimli ishlar amalga oshirilmoqda.
Xodimlarning bo‘sh vaqtini mazmunli tashkil etish va intellektual salohiyatini rivojlantirish maqsadida zamonaviy kutubxona faoliyat yuritmoqda. Unda turli sohalarga oid adabiyotlar jamlangan bo‘lib, fond muntazam yangilanadi. Bu esa kitobxonlik madaniyatini oshirishga xizmat qilmoqda.
Qo‘mitaning boy tarixini e’tirof etish va avlodlar davomiyligini ta’minlash maqsadida fidokorona mehnat qilgan ustozlar xotirasiga bag‘ishlangan muzey tashkil etilgan. Muzeyda tarixiy eksponatlar, hujjatlar va fotosuratlar jamlanib, xodimlarda faxr va sadoqat tuyg‘usini mustahkamlab bormoqda.
Xodimlar salomatligi doimiy e’tibor markazida. Qo‘mita huzuridagi tibbiy punktda birlamchi xizmatlar ko‘rsatilmoqda. Zarur hollarda kasaba uyushmasi ko‘magida chuqurlashtirilgan tibbiy ko‘riklar ham tashkil etilmoqda.
Mehnat samaradorligini oshirish maqsadida ish joylari zamonaviy texnika va texnologiyalar bilan to‘liq jihozlangan. Bu xodimlarga o‘z vazifalarini sifatli va samarali bajarishga imkon bermoqda.
Yaratilgan ushbu shart-sharoitlar qo‘mita jamoasining farovonligini ta’minlash, mehnatga bo‘lgan qiziqishni oshirish va sog‘lom ish muhitini shakllantirishga xizmat qilmoqda. Bularning barchasi ijtimoiy sheriklik tamoyillariga tayangan holda xodimlarning ijtimoiy-iqtisodiy himoyasini kuchaytirishga yo‘naltirilgan.