2026 йил 13 март куни Тошкент шаҳрида Ўзбекистон Республикасида 2026–2030 йилларга мўлжалланган Статистикани ривожлантириш миллий стратегияси лойиҳасига бағишланган консультацион семинар бўлиб ўтди.
Мазкур тадбир Ўзбекистон Республикаси Миллий статистика қўмитаси томонидан Жаҳон банки билан ҳамкорликда ташкил этилди. Унда вазирлик ва идоралар, илмий-тадқиқот институтлари, халқаро ташкилотлар ҳамда ривожланиш бўйича ҳамкорлар вакиллари иштирок этдилар.
Семинар давомида мамлакат Миллий статистика тизимининг ҳозирги ҳолати бўйича баҳолаш натижалари ҳамда янги стратегия доирасида статистикани ривожлантиришнинг асосий йўналишлари тақдим этилди.
Иштирокчилар статистика тизимини модернизация қилишнинг муҳим устувор йўналишларини, жумладан халқаро статистика стандартларини жорий этиш, рақамли технологияларни ривожлантириш, маъмурий маълумотлардан кенг фойдаланиш ҳамда статистика маълумотларининг очиқлигини ошириш масалаларини муҳокама қилдилар.
Шунингдек, расмий статистиканинг сифати ва тезкорлигини ошириш, маълумотларни йиғиш ва таҳлил қилишнинг замонавий усулларини жорий этиш ҳамда статистика тизими кадрлар салоҳиятини мустаҳкамлаш масалаларига алоҳида эътибор қаратилди.
Семинар давомида Жаҳон банки вакиллари ва халқаро экспертлар иштирок этиб, статистика тизимини янада такомиллаштириш бўйича ўз тажрибаси ва тавсияларини тақдим этдилар.