Боку шаҳрида ташкил этилган III Халқаро статистика форуми доирасида Ўзбекистон Республикаси Барқарор ривожланиш мақсадлари (БРМ) доирасида болалар тўғрисидаги маълумотларнинг мавжудлиги ва янгиланиш даражаси бўйича минтақада етакчи давлат сифатида эътироф этилди.
UNICEFнинг сўнгги таҳлилига кўра, Ўзбекистонда 2020 йилдан кейинги даврда болаларга оид БРМ кўрсаткичларининг 77 фоизи камида битта янгиланган маълумотга эга. Бу кўрсаткич МДҲдаги ўртача 55 фоиз ва Европа–Марказий Осиё минтақасидаги 53 фоиз кўрсаткичлардан анча юқори. Бу мамлакатимизда болаларга оид ижтимоий дастурларни статистик таъминлашда шаффофлик ва очиқлик юқори даражада эканини кўрсатади.
Мазкур даража Ўзбекистоннинг статистика тизими фаол ишлаётгани, даврий кузатувлар ва маълумотларни йиғиш ижтимоий сиёсат, болаликни муҳофаза қилиш ва БРМ бажарилишини мониторинг қилиш учун айниқса муҳим бўлган кенг кўламли йўналишлар бўйича олиб борилаётганини кўрсатади. Бундай позиция Ўзбекистонни минтақадаги етакчи мамлакатга айлантиради, бу эса халқаро ташкилотлар ва фуқароларнинг миллий статистикага бўлган ишончини оширади.
III Халқаро статистика форумида Миллий статистика қўмитаси вакиллари маълумотларни тезкор йиғиш учун рақамли платформаларни жорий этишдан тортиб, БМТнинг Европа иқтисодий комиссияси статистика бўлими ва БМТнинг бошқа агентликлари билан ҳамкорлик қилишгача бўлган мониторинг тизимларини янада ривожлантириш режалари билан ўртоқлашди.