Ўзбекистон Республикаси Президентининг “Аҳоли ва қишлоқ хўжалигини рўйхатга олиш тўғрисида”ги ПФ–173-сонли Фармони ижросини таъминлаш мақсадида Андижон вилоятида мазкур тадбирга оид ўқув-семинарлар олиб борилмоқда.
Вилоят статистика бошқармаси ҳамда туман ва шаҳар статистика бўлимлари томонидан рўйхатга олувчи ходимларни тайёрлайдиган мураббийлар учун амалий ўқув-семинарлар ташкил этилмоқда.
Семинарлар давомида иштирокчиларга Фармоннинг мазмун-моҳияти, рўйхатга олиш жараёнининг босқичлари ва аҳамияти ҳақида атрофлича тушунчалар берилаётир. Шу билан бирга, рўйхатга олишда қўлланиладиган ахборот тизимлари, электрон саволномаларни тўлдириш тартиби ва ахборот хавфсизлиги масалалари юзасидан амалий тавсиялар ҳам тақдим этилмоқда.
Мазкур ўқув-семинарлар аҳоли ва қишлоқ хўжалигини рўйхатга олиш тадбирини юксак савияда, халқаро стандартлар талабларига мос ҳолда ташкил этишга хизмат қилади. Шу орқали аҳоли сони, таркиби ва қишлоқ хўжалиги ресурслари тўғрисида ишончли маълумотлар базасини яратишга замин яратилади.